Aiarako Udalak behin betiko erabaki hartu zuen osteguneko udalbatzan Aiarako Kuadrillaren egoitzari buruz. Udalerriak baiezkoa eman zion "Sindikatuaren eraikina" kuadrillari lagatzeari.
Toki horretan zein zerbitzu eta zein aldaketa eta obrak egin behar dituen zehaztuko beharko du bere jabe berriak, Kuadrillak egikaritu beharko baititu bulego berrien lanak.
Horrez gain, Aiarako herriak bertan dituen zenbait azpiegitura (Emakumeen Gela eta Bake Epaitegia) beste toki batera mugitu beharko ditu. Hala ere, Gentza Alamillo alkateak azaldu dio Aiaraldea Komunikabideari denbora dagoela hori guztia zehazteko, bi urteko prozesua beharko baita, gutxienez.
Urrats horrekin, amaiera emango diote Aiarako Kuadrillan egondako eztabaida historikoari. Izan ere, egoitza beste eraikin batean egotea aurreikusi zen hainbat urtez, baina egitasmoa ez zen inoiz gauzatu.
Gero, urte luzez egon zen bizirik eztabaida Aiara, Artziniega, Laudio, Amurrio eta Okondoko Udalak batzen dituen erankudean. 2021era arte ez zen adostasuna heldu, egoitza Aiaran finkatzea erabaki zenean.
Urte horren amaieran, Alamillo pozik agertu zen erabakiarekin: "Kuadrillak bost udalerriri ematen die zerbitzua, baina bereziki hiru udalerri txikiri (Aiara, Okondo, Artziniega). Ez daukagu teknikaririk eta guri ematen digu zerbitzua gehienbat. Hortaz, Aiaran geratzeko erabakiak positiboki eragingo du lurralde orekan".