Arabako XLVIII. Bola Txapelketa abiatu zuten iragan martxoaren 11n eta 12an, Kexaako eta Beotegiko bolatokietan egindako jaurtiketetan. Guztira 53 kirolari elkartu ziren txapelketaren hasieran, gizon eta emakumezkoen kategorietan.
Gizonezkoen sailkapenean Aitor Parrilla dago buru, 162 punturekin orotara. Atzetik ditu Carlos eta Oscar Olabarrieta anaiak, 156 eta 154 punturekin, hurrenez hurren. Sailkapenean laugarren postua okupatzen ari den Imanol Ibarrondok ere 154 puntu lortu zituen Kexaako eta Beotegiko jaurtiketetan.
Emakumezkoen sailkapenean Estrella Alonso da lehenengoa 146 punturekin, Bea Miras bigarren 139 punturekin eta Bea Isasi hirugarren 137 punturekin.
Asteburuan Laudion
Asteburu honetan -martxoak 25 eta 26- Laudioko bolatokietan izango du segida Arabako txapelketak.
Larrazabal auzoko San Joan bolatokian eta Gardeako bolatokian neurtuko dira kirolariak, sailkapenean puntuak gehitzeko asmoarekin. Arabako txapelketako lehenengo sailkatuak jarraian jokatuko den Euskal Herriko txapelketara igaroko dira.