Mobilizazioak abiatu dituzte Etxaurren Ikastolako gurasoek, autobus zerbitzua berrezarri dadin

Txabi Alvarado Bañares 2023ko ira. 8a, 13:27
Deskargatu Info Ahotsak :

Auto karabana sortu dute gaur goizean hezkuntza zentroko bidean, eta astelehenean ez dituzte haurrak klasera eramango.

Auto ilara luzea osatuz eta klaxonak joz iritsi dira gaur goizean Etxaurren Ikastolako gurasoak Aiarako hezkuntza zentrora. Modu horretan abiatu dute protesta dinamika, autobus zerbitzurik gabe daudela salatzeko. 

Atzo izan zen klaseko lehen eguna, eta hezkuntza zentrora ohikoan iristen diren 8 autobusetatik bakarrak (Luiaondotik doanak) bete zuen bere bidea, Eusko Jaurlaritzak autobus enpresekin dituen desadostasuna dela eta. Horren ondorioz, ikasturte hasiera “kaotikoa eta konplikatua” izan zen, guraso elkarteko kideen hitzetan. 

Greba astelehenean

Egoera ikusita, Aiara eta Okondoko udal ordezkariekin bildu ziren atzo guraso elkarteko kideak eta hezkuntza zentroko zuzendaritza. Bertan erabaki zuten mobilizazio dinamika abiatzea.

Gaur sortutako ibilgailu karabana izan da lehen urratsa. Astelehenean jarraituko dute protestarekin, “haurren greba” eginda (ez dituzte seme-alabak eskolara eramango). Asteartean, aldiz, mobilizazioa egingo dute eskola inguruko errepidetik. 

Gurasoek nabarmendu dutenez, ikastolan dauden 227 haurren %98ak erabiltzen du autobus zerbitzua. “Eskola garraioa Euskal Eskola Publikoaren erabiltzaile gisa dugun eskubidea da eta Eusko Jaurlaritzak uneoro bermatu behar du”, aldarrikatu dute, “familiak eta hezkuntza publikoa ez gara trukerako erabil daitezkeen txanponak”.

Hezkuntza Aiara

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide