Iaz gertatu bezala, ikastetxeen garraio zerbitzua kolokan dago. Berez, Bizkaian eta Araban ibilbide gehienak ez daude bermatuta, Eusko Jaurlaritzak iazko prezio berean ordaindu nahi baitzituen eta konpainiak ez daude horrekin ados.
Gipuzkoan enpresek prestutasuna adierazi dute zerbitzua eskaintzeko, baina ez Araban eta Bizkaian.
Korapilo horri gehitu behar zaio Eusko Jaurlaritzak agindua argitaratu zuela atzo enpresak zerbitzua ematera behartzeko.
Garraio konpainien elkarteek helegitea aurkeztuko dute, baina bitartean ez dago argi zer gertatuko den.
Horren isla izan da Aiaraldeko egoera gaur. Ikastetxe batzuek ez dituzte klaseak hasi (Arrankudiagakoa edo Zaraobe Institutua, esaterako), eta, ondorioz, ez dakite bihar zer gertatuko den.
Beste batzuek gaur ikusi dute euren ikasleek ez zutela zerbitzurik (Urduñako Herri Eskolak, adibidez), eta Onieva Autobuses enpresak ziurtatu du berari dagozkion ibilbideak beteko dituela: Etxaurren Ikastolakoa, Laudio Institutukoa, Zaraobe Institutukoa eta Latiorro Eskolakoa, hain zuzen.
Une hauetan, enpresek ez dute adierazpenik egin nahi izan, egoera tenkatu delako eta sektoreko elkarteek egingo dituztelako bozeramaile lanak.