Hodei Muñozek oso hasiera latza izan zuen ziklokros denboraldian urriaren 1ean. Izan ere, Xixongo lasterketara bertaratu zen ia ezer entrenatu gabe, auto batek harrapatu baitzuen entrenatzen ari zelarik abuztuan eta horrek atsedena hartzera eta sendatzera eraman zuen, sasoian egoteko baliatu behar zituen asteetan.
Hala eta guztiz ere, prestaketa txiki baten ondoren, laugarren postua eskuratu zuen Asturiasen.
Hurrengo egunetan ziklokrosaren alde teknikoak landu zituen kirolariak eta urriaren 7an garaipen sortaren lehen mugarria jarri zuen Pontevedran. Izan ere, han irabazi ondoren, Marinera jo zuen eta han ere nagusitu zen.
Azken egunotan, ordea, Ribadumian -Galizian- eta Melgaçon -Portugalen- gailendu da, lau aldiz lehenengo postua hartuta podiumean. Aipatzekoa da Ribadumiako probaren bezperan kolpe handia izan zuela eta minduta bete zuela hurrengo egunean ibilbidea.
Lorpen horiei esker Espainiako Kopako lehen sailkatua da, baina UCIko sailkapeneko lidergoa ere berea da.
Dena den, Muñozek umiltasunez hartu du egindakoa. "Poz-pozik nago eta lan gehiago egiteko gogoz, hobetzeko", esan dio Aiaraldea Komunikabideari.
Bere hurrengo erronkei buruz galdetuta, luiaondoarrak jakinarazi du Espainiako Kopan eta Europako Txapelketan daukala burua. Horrez gain, Amurrioko lasterketa eta Benidormeko Munduko Txapelketa ere bere egutegian markaturik daude.
Txirrindulariak balorazio positiboa egin du errepideko denboraldiari dagokionez, Espainiko Kopako hirugarrena izan baitzen, eta podium ugari zapaldu zituen. Hala ere, izandako harrapaketak ilundu zuen lortutakoa: "Pixka bat txarto amaitu nuen istripuarekin, baina pozik".