J. R. S. aiararra Aiaraldea Komunikabidearekin jarri da harremanetan salatzeko ia urte eta erdi itxaron behar izan duela kontrolezko kolonospia bat egiteko. Zehazki, bere medikuak 2022ko abenduan eskatu zuen zita eta aurtengo apirilera arte ez diote egingo. Bere ustez, ez da onargarria horren luzea izatea itxaronaldia.
Berez, Aiarako herritarrak 2015ean izan zuen ebakuntza: "Kolonoskopia egin zidaten eta bi polipo kendu zizkidaten, baina hirugarren bat kentzeko gai ez ziren izan. Hortaz, hestearen zati bat moztu eta berriro lotu zidaten".
Horren ostean, kontrolerako bi kolonoskopia egin zizkioten eta ez zen tumorerik agertu. Hori bai, 2018an adierazi zioten 2023ko lehen hilabeteetan egin behar zuela beste bat. "Duela bost urte programatu zidaten prozedura", argitu du aiararrak.
Gauzak horrela, 2022ko abenduan eskatu zuen bere medikuak zita eta horrezkero hiru erreklamazio aurkeztu ditu J. R. S.-k: "Azkena idatziz izan zen eta Amurrioko anbulatoriotik heldu zitzaidan eskutitza, esanez digestibora bideratuko zutela nire kasua. Amurriora bertaratu nintzen eta azaldu nuen ez nuela diagnostiko berririk behar, baizik eta proba egitea, aurreikusita zegoena. Orduan Usansoloko Ospitalera deitu zuten eta erantzun zieten itxaron zerrendan nengoela. Hori uztailean izan zen".
Geroztik ez du berririk izan astelehenera arte: "Beste hitzordu bat eskatu behar nuen eta esan zidaten apirilean izango dela kolonoskopia", argitu du aiararrak. "Nire kasua publiko egitea erabaki dut ikusita Laudion gertatu zena eta hau ez dela bidezkoa, nire ustez", aipatu du.
