Aiarako udal gobernuaren lehen urteko ibilbidearen balorazioa egin du EAJk, ohar baten bidez. Alderdi jeltzalearen aburuz, “atzerakada larria” pairatu du udalerriak EH Bildu agintera iritsi zenetik, “kudeaketa eta gardentasun faltagatik”.
Aiara Batuzek hauteskunde kanpainan betetako papera ere deitoratu dute jeltzaleek, “lohiaren kanpaina” izan zela nabarmenduta. Gentza Alamillok talde horretako zinegotzia den Iratxe Parrori leporatu dio erreferentziazko ospitale-aldaketaren aurkako protesten atzean egotea. “Mobilizazio horiek nabarmen amaitu ziren Pruden Otegui abertzaleak alkatearen makila eskuratu zuenean, eta gaur egun ospitaleari dagokion egoera udal hauteskundeen aurreko bera da”, nabarmendu du bozeramaile jeltzaleak. Bere iritziz, Iratxe Parrok “bere benetako helburua” lortu zuen modu horretan, ez zela alkatetzara iristea, “EAJ-PNV alkatetzatik kentzea baizik".
“Jaurlaritzaren kudeaketa zalantzan jartzea” ere leporatu diote jeltzaleek udal gobernuari
"Aurrekonturik gabe"
Gaur egungo egoerara itzuliz, Alamillok ziurtatu du Aiarako egoera politikoak eta administratiboak ez duela hobera egin, eta kanpainako “promesak eta mobilizazioak” desagertu egin direla, “udalerria proiektu argirik eta ibilbide-orri zehatzik gabe utziz”.
Horri lotuta, zinegotzi jeltzaleak salatu du oraindik ez dagoela 2024rako aurrekontuen zirriborrorik. "Oraindik ez dago aurrekontuen zirriborrorik eta, okerragoa dena, 2023ko kontu orokorrak ere ez dira onartu. Egoera horren ondorioz, ezinezkoa da proiektu eta inbertsio berriak egitea eta Aiarako herritarren beharrak asetzea, eta nabarmen mugatzen da bizilagunen gizarte-ongizatea”.
Horrez gain, “Jaurlaritzaren kudeaketa zalantzan jartzea” ere leporatu diote jeltzaleek udal gobernuari. "Administrazio plazaren LEParen prozesua oso motel doa aurrera, eta udal kudeaketa negargarriak udal igerilekuak uztailean eta abuztuan ordu erdi lehenago ixtea eragin du”, salatu du Alamillok.
“Barne koordinazio falta” dagoela ere gaineratu du alkate jeltzale ohiak: "alkateari galdera bat egiten zaionean, begiradak hasten dira nork erantzuten duen ikusteko: Iratxe Parro alkateordeak edo Izaskun Garciak. Gainera, barne desadostasunak daude, Arespalditzako zabu berrien kasuan bezala, estaltzeari dagokionez".
Hiri Antolamenduko Plan Orokorraribilera "bat bera ere ez" egin izana ere deitoratu dute jeltzaleek
Hiri Antolamenduko Plan Orokorrari dagokionez ere ez da aurrerapenik egon, jeltzaleen aburuz: "Urtebete igarota, ez dugu bilera bakar bat ere izan, ezta aurrerapauso esanguratsurik ere gure udalerriaren garapenerako erabakigarria den plan honetan".
Horregatik guztiagatik, opozisioko talde politikoak uste du “interés komun batek soilik” lotzen dituela EH Bildu eta Aiara Batuz udal gobernuan: “EAJ-PNV alkatetzatik kanpo mantentzea”. Horren aurrean, jeltzaleek nabarmendu dute aiarrarek merezi dutela “beren beharrak eta eskaerak modu eraginkor eta gardenean kudeatzeko gai izango den” gobernu bat, eta ondorioztatu dute egungo gobernuak lortu duela “aldaketarena” izatea, “baina betebehar horiek betetzeko gaitasunik ez duelako".