Aiarako Udala oso modu kritikoan adierazi da Renfek C-3 linean egindako ordutegi aldakatei buruz. Izan ere, ezarritako Civis zerbitzuek ez dute geltokirik Luiaondon eta horrek ekarri du hamasei tren gutxiago gelditzea Aiaran.
Horren eragin zuzenena pairatzen dute goizeko lehen orduko erabiltzaileek, 7:30ean igarotzen zen trena gabe geratu baitira urtarrilean. "7:30etako trena, Luiaondon lanera edo ikasketetara joateko erabiltzaileek hartzen zutena, kendu egin da, eta horrek protestak eragin ditu, beharrezko ordutzat jotzen baita. Gauza bera 8:30etako trenarekin", azpimarratu du Udalak.
Renfe ez da agindutakoa betetzen ari Luiaondon
Tokiko erakundeak aldarrikatu du urtarrilean ezarritako moldaketekin Renfek aipatu zuela bere asmoa zela ordu laurdenero lotzea Laudio eta Bilbo eta ordu erdiro Urduña eta Bilbo, baina hori ez da gertatzen Luaiondon. "Tren bat dago 7:18ean eta beste bat 7:54ean, hau da, ordu erdi baino gehiagoko tartearekin", nabarmendu dute.
Konponbide eske
Ulertuta Renferen asmoa garraio publikoaren erabilera sustatzea dela, Aiarako Udala enpresarekin jarri da harremanetan egoera konpontzeko, baina, momentuz, ez du lortu. Bide errazena litzateke 7:30ak aldera Luiaondotik igarotzen den Civis zerbitzua Luiaondon geratzea, baina enpresa publikoak argudiatu du Civis bat Aiaran gelditzeko baldintzak ez direla betetzen, ez dagoelako erabiltzaile kopuru nahikorik.
Civis trenak Luiaondon gelditzea, bide bakarra
Edonola ere, Aiarako Udalak uste du eragindako kaltea ezerezean uzteko aukera dela Civis zerbitzuak Luiaondon gelditzea, eta hori exijitu dio Renferi.
Halaber, aldarrikatu du garraio publikoa ezinbestekoa eta garrantzitsua dela Aiaran: "Luiaondo Aiarako udalerriko kontzejurik jendetsuena da, 1.300 biztanle ingurukoa. Udalerriko 24 kontzejuek trenez komunikatzen duten geltoki bakarra hor dagoena da, eta Aiaran bizi direnak joaten dira geltoki horretara trenean sartzeko. Biztanleria potentziala ia 2.900 biztanlekoa da, eta biztanleria horrek mugikortasun-arazo larriak ditu, udalerria sakabanatuta dagoelako eta zerbitzu publikoak urriak direlako".
Bide batez, gogoratu dute tren zerbitzuarekin ez ezik, autobusekin ere arazoa dutela, ez direlako Luiaondon sartzen, eta aldarrikatu dute udalerria ezin dela zokoratuta geratu.