Aiarako udalerriaren ezaugarri nagusietako bat da bere biztanleriaren sakabanaketa 24 administrazio batzarretan. Horrek mugikortasuna bermatzea zailtzen du garraio publikoaren ikuspuntutik, besteak beste, CO2 isurketak ekiditeko.
Gauzak horrela, Udalak Kudea Go aplikazioa aurkezteko hitzaldia eskainiko du bihar 19:00etan Luiaondoko Kultura Etxean. Erakundearen gomendioa da telefonoa eramatea, unean bertan deskargatzeko eta nola erabiltzen den ikasteko.
Dena den, herritarren eskura jarri dute jadanik Kudea Go aplikazioa, hemendik instalatu daitekeena sakelakoan.
Erabat doakoa da erabiltzaileentzat, Kudea Servicios Positivos enpresak, berez, hitzarmenak sinatu baitu tokiko erakundearekin.
Tresna horren bitartez, instalatzen duenak badu garraio publikoaren inguruko informazioa, baina, horrez gain, garraio pribatua partekatzeko aukera ere ematen du.
Modu horretan, Kudea Gok bilatzen du aiararren arteko sarea sortzea ahalik eta gehien murrizteko ibilgailu pribatuaren erabilera eta, ondorioz, gizarte egituratzea eta CO2 isurketak murriztea.
Mugikortasuna
Berez, mugikortasuna bilakatu da udal gobernu taldearen buruhaustea azken hilabeteetan eta Arabako Foru Aldundiari eta Renferi eskatu dizkie neurriak hartzeko aiararrek zerbitzu egokia izan dezaten garraio publikoaren esparruan. Hain zuzen, pasa den astean sinadura bilketak abiatu zituzten udal bulegoetan.