Aiarako garraio zerbitzu publikoa egokia ez dela iritzita, Udalak urrats berriak egin ditu hori konpontzeko. Zehazki, sinadura bilketak bultzatu ditu Arespalditzako eta Luaiondoko udal bulegoetan eta administrazio batzarretan.
Alde batetik, testu batek exijitzen dio Renferi tren azkar guztiek (hau da, Civis deiturikoek) geltokia izatea Luiaondon. Duela gutxi salatu zuen tokiko erakundeak urtarrilean C-3 linean indarrean sartutako ordutegiak kalteak eragin dizkiela aiararrei eta hori konpontzeko bidea dela uste dute. "Aldaketek ez dute hobekuntzarik ekarri udalerriko mugikortasunean; aitzitik, kontziliazio-arazoak sortu dituzte, ikasketetara edo lanera garaiz iristekoak, eta autoa erabiltzera behartu dute zerbitzu hori duten beste geltoki batzuetara, trena hartu ahal izateko", salatu dute.
Beste sinadura bilketaren xedea da Alavabusek L15 eta L16 lineetako autobusei bi geltoki ezartzea Luiaondon. "L15 linearen kasuan, maiztasunak handitzea eskatzen dugu, eta L16 linearen kasuan, herrian sartzea geldialdiak egiteko. Luiaondo, ulertezina bada ere, isolatuta geratu da linea horretan Aiarako gainerako herrietatik, nahiz eta kontzeju jendetsuena izan", jaso du testuak.