Duela urtebete iragarri zuen SteelPhalt enpresak asfalto jasangarria ekoizteko fabrika bat irekiko zuela Murgako poligonoan. Gaur inauguratu dute azpiegitura, eta Imanol Pradales lehendakaria bertaratu da irekiera ekitaldira, beste hainbat ordezkari instituzionalekin batera: Ramiro Gonzalez (Arabako Ahaldun Nagusia), Marisol Garmendia (Espainiako gobernuko ordezkaria) edota Pruden Otegi (Aiarako alkatea), besteak beste.
30.000 metro karratu okupatzen ditu lantegiak eta 15 langile ditu. Asfaltoa sortuko dute bertan, altzairutegietako hondakinak baliatuta.
Harsco Environmental multinazionala da SteelPhalt enpresaren jabea, eta honakoa da Espainiako Estatuan irekitzen den ekoasfaltoko lehen zentroa. Nabarmendu dutenez, orain arte Erresuma Batuan baino ez zegoen mota honetako faktoria bat.
Pradalesek hartu du hitza inaugurazio ekitaldian, eta ziurtatu du Europako berrindustrializazio prozesuak "aukeren garai berri bat" irekiko duela Aiaraldea bezalako zonalde industrialetan, “azken hilabeteetan bizitzen ari den une zailetik harago”.
Horri lotuta, aldarrikatu du aukera hori baliatu behar dela. "Gaitasun horiei ahalik eta etekin handiena atera behar diegu, buruarekin jokatuz. Lehiakortasunean abantaila lortzeko, eta trantsizio ekologiko ordenatu, orekatu eta bidezkoa ahalbidetzeko", adierazi du Lehendakariak, eta deskarbonizazio-prozesuak "azkartu" behar direla ere aipatu du, baina "sektore, jarduera eta pertsona bat bera ere atzean utzi gabe".
Gauzak hala, gobernuburuak aukera baliatu du Espainiako Gobernuari gauza bat eskatzeko: "konpromiso irmoa" hartzea "Euskal Autonomia Erkidegoaren ahalmen elektrikoa handitzeko".
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!