1.644 sinadura bildu ditu guztira Aiarako Udalak urtarriletik hona, "udalerriko mugikortasun jasangarriaren alde", eta dagoeneko helarazi dizkie Aldundiari eta Eusko Jaurlaritzari.
Zehazki, 844 sinadura erregistratu ditu tokiko erakundeak Arabako Foru Aldundian, L-15 eta L-16 lineetako autobusak Luiaondon sartzea eta "horretarako prestatutako bi geralekutan gutxienez gelditzea" eskatzeko. Udalak nabarmendu duenez, gaur egungo zerbitzuak hainbat gabezia ditu alde horretatik. A-15 linean, adibidez, aldez aurretik eskatu behar da Luiaondon geratzea, eta ordutegi batzuetan soilik egin daiteke. Tokiko erakundearen arabera, 21 autobusetatik batzuk soilik sartzen dira Aiarako herri populatuenean. L-16 lineak, aldiz, ez du geldialdirik egiten Luiaondon. Horren ondorioz, herri hori "isolaturik" geratzen da "Aiarako gainontzeko herrietatik".
Tren zerbitzuari dagokionez, Udalak beste 800 sinadura bildu ditu Civis trenak Luiaondon geratzea eskatzeko, eta Eusko Jaurlaritzari helarazi dizkio. Udalak gogogorarazi du 7:30 eta 8:30etako trenak kendu egin direla, eta "protestak" eragin dituela horrek erabiltzaileen artean, "lanera edo ikasketetara joateko" baliatzen zirelako.
Udalak azaldu du Renfek eman duen azalpena dela ordu horietan Civis tren bat igarotzen dela C-3 lineatik, eta Luiaondo ez dela iristen tren hori bertan gelditzeko gutxieneko erabiltzaile kopurura.
Horren aurrean, Udalak zalantzan jarri du erabiltzaile kopuruaren azterlan hori "benetako beharretan oinarrituta" egin den. Izan ere, tokiko erakundearen aburuz, luiaondoar asko autoz joaten ziren Aretara trena hartzera, geltoki horretan maiztasun handiagoa zuelako zerbitzuak eta trenek "atzerapen eta bertan behera uzte ugari" izan dituztelako "pandemiaz geroztik".
Gauzak hala, aurkeztutako sinadurei "ahalik eta azkarren erantzutea" esatu die Udalak Aldundiari eta Jaurlaritzari, “Aiaralderako programatzen diren hobekuntzetatik ezin baita Aiarako udalerria alde batera utzi”.