Final-laurdenetako ligaxkan lortutako bi garaipen sendoek, eta atzo Donostiako Atano pilotalekuan Altuna III.-ak Zabala menderatu izanak, Buruz Buruko txapelketan aurrera egiteko aukera matematikoa eskaini dio Iker Larrazabali.
Lehenengo urtea du Olabezarreko aurrelariak txapelketan, baina sendotasuna erakutsi du orain arte jokatutako partidetan. Ezkurdia garaitu zuen aurrena, eta final-laurdenetan oso ondo aritu da ere. Apirilaren 13an ezbairik gabeko garaipena lortu zuen Jokin Altuna iazko txapeldunaren aurka. Apirilaren 19an, aldiz, ligaxkako bigarren partida irabazi zuen, Dario errioxarraren aurka.
Bi garaipen horiek eskuratuta, atzo Donostiako Atano pilotalekuan gertatuko zenaren esperoan geratu zen Larrazabal. Altunaren garaipenak matematikoki sailkatuko luke finalerdietarako, eta horrela gertatu zen.
Oraindik zehaztu gabe dago noren aurka neurtuko den Larrazabal finalerako txartelaren bila. Aurretik final-laurdenetako ligaxkako azken partida bat jokatu beharko du, maiatzaren 3an Labrit pilotalekuan, Zabalaren aurka, baina ez du ezer izango jokoan Olabezarrekoak.