Zer da Euskaraldia zuretzat?
Euskaldun berria naiz, niretzat aukera bikaina da euskaraz harremanak eta solasaldiak izateko eta normalean euskaraz hitz egiten ez dudan jendearekin harremanak euskaraz izateko.
Horrela, gero denboran zehar mantentzen den ohitura bat erraz sortu edo mantendu daiteke. Inguruagatik edo ohituragatik, pertsona askorekin harremanetan jartzen gara gaztelaniaz. Zaila da ohitura aldatzea, baina horrelako jarduerek harreman hori euskaraz berriro sortzen laguntzen digute.
Era berean, arrazoi bategatik edo besteagatik ez dugu euskaraz nahiko genukeen jarioarekin hitz egiten, uste dut oso aukera ona dela euskaraz modu naturalagoan edo arinagoan hitz egiten dutenekin harremanak euskaraz praktikatzeko eta sustatzeko.
Nola parte hartuko duzu bertan?
Ahalik eta modu naturalenean, urtez urte errazagoa iruditzen zait. Aurreko edizioetan bezala, nahiz eta hitz egiten ari naizen gaiaren arabera, batzuetan hitzik gabe geratuko naizen, ahobizi izango naiz.
Esparru batzuetan errazagoa egiten zait hori egitea: lanean, kirola egiten dudan bitartean edo dagoeneko euskaraz erlazionatzen naizen pertsonekin nagoenean. Hauetan asko pentsatu gabe egin dezaket eta. Agian, zailagoa izango zait hizkuntzaz aldatzea, txipa aldatzea, normalean beste hizkuntza batzuetan erlazionatzen bainaiz pertsonekin edo administrazioarekin zeozer egin behar denean. Baina, hain zuzen ere, hori da kontua, gure erosotasun eremutik pixka bat ateratzea.
Zure inguruko hizkuntza ohituretan eragina izango duela uste duzu?
Zalantzarik gabe, bai. Gero eta pertsona gehiagorekin hitz egiten dut eguneroko eginbeharretan euskaraz, eta ez da kasualitatea.
Urte asko dira egunero, lanean edo telefonoari erantzuten diodanean proba dezente egiten ditudala. Gure ohiturak alda daitezkeela erakusten duen frogatuta daukadan adibide erraz eta argi bat da beste pertsona batek entzuten duen lehen hitza euskaraz bada, zuri berdin erantzuten saiatuko dela, baina ohituragatik edo aurreiritziengatik elkarrizketa beste hizkuntza batean hasten badugu, litekeena da, jakin arren, euskaraz ez erantzutea.
Nire iritziz, arreta berezia jarri behar diogu elkarrizketen hasierari, horrek markatzen baitu pertsona horrekin izango duzun elkarrizketa edo harreman guztia.