Gaur abiatuko dute Luiaondoko Aste Kulturala Aiarateka elkarteak, tokiko Administrazio Batzarrak eta Aiarako Udalak. Beste urteekin alderatuta, haurrak izango dira jarduera gehienen hartzaileak.
Egitaraua larunbatera arte luzatuko da eta gaur 18:00etan ludotekan gai garrantzitsua zein ahaztua landuko dute: dolua umeen artean eta beharrezko tresnak prozesu horri aurre egiteko. Alazne Elejalde psikologoaren eta Maitane Perez idazlearen eskutik jorratuko dute gaia.
Bihar ekintza arinagoak egongo dira umeentzat. Izan ere, Otueta Gizarte Etxean 17:30ean hamabi urteko azpikoentzat akuarela tailerra eskainiko dute eta ordu berean, baina Ludotekan, haurrentzako tailerrak.
Asteazkenean kantxa estalian bi proposamen egongo dira. 17:00etan altxorraren bila arituko dira eta 18:30ean, aldiz, bizikleta ginkana egingo da. Bigarren ekintza horretan norberak bere txirrindula eraman beharko du.
Arropa, txoripana eta zinema
Ostegunean eskaintza hirukoitza izango da. 17:30ean arropa kustomizatzeko tailerra egingo dute, 19:00etan txoripana nola prestatzen den azalduko dute eta 21:30ean, azkenik, Korterraza film laburren jaialdi ibiltariaren txanda izango da. Dena frontoian izango da eta txosna zerbitzua egongo da.
Ostirala eta larunbata, helduentzat ere
Egitarauaren izaera anitzagoa izango da Aste Kulturalaren azken bi egunetan, umeak ahaztu gabe. Hain zuzen, ostiralean aurpegi margoketarekin hasiko dira 18:00etan pilotalekuan eta 19:30ean Kaitin Allende umoregile okondoarrak bakarrizketa eramango du, biran buru-belarri sartuta baitago.
21:00etan Holi festaren unea izango da. Pertsona bakoitzak bere holi hautsak eraman ditzake edo bertan erosi (poltsa batek euro eta erdi balioko du eta lauk, ordea, bost euro). Antolatzaileen aholkua da kamiseta zuria eta urpeko betaurrekoak janztea.
Ordu berean KM Music DJren txanda izango da. Txosna zerbitzuak edaria eta ogitartekoak jarriko ditu eskura.
Amaitzeko, larunbatean parrillada antolatu dute 19:00etan. Tiketak egun berean salgai egongo dira.
Ekintza guztiak dira doakoak, baina umeentzat diren gehienak exijitzen dute aurretik izena ematea 688 78 36 67 telefono zenbakian.