Aingeru Olabarrietak bere lehen gola sartu du FC Andorrarekin

Aitor Aspuru Saez 2025eko irailaren 14a
Deskargatu Info Ahotsak :

Poztasunez ospatu du Olabarrietak gola. / FC Andorra

Luiaondoarraren ekarpena erabakigarria izan da, berdinketa jarri baitu markagailuan bere taldeak galtzen hasi eta gero. Athletic Clubak bigarren mailako klub horretan laga du abiatu berri den denboraldian.

Aingeru Olabarrietak Athletic Clubeko lehen taldea utzi zuen abuztuan bigarren mailan aritzeko eta minutuak eskuratzeko FC Andorran. Gaur bertan erakutsi du aprobetxatzen ari dela bere egonaldia printzerrian. Izan ere, bere lehen gola gauzatu du Gerard Piqué presidentearen aurrean eta etxean garaipena lortzeko bidea ireki du.

Hain zuzen, FC Andorra galtzen hasi da berehala Cordobaren kontra, lehen minutuan Petxarromanek gola egin baitu bere atean. 18 minutu igaro behar izan dira Aingeru Olabarrietak norgehiagoka berdintzeko. 

Gero Kim Min Suk eta Danik beste bi aldiz zulatu dute Cordobaren atea eta 3-1 amaitu da partida. Olabarrietak ez ditu 90 minutuak jokatu, baina 69. minutura arte lehiatu da eta kazetarien kritikak oso onak izan dira. 

Emaitzari esker, Andorra bosgarren kokatu da sailkapen nagusian.

Ikusgarritasun handiko proiektua

Aingeru Olabarrieta ez dago bigarren mailako edozein klubean. Berez, FC Andorra Gerard Piqué FC Barcelonako kapitain ohiaren kirol proiektua da eta, horregatik, aparteko ikusgarritasuna dauka.

Ibai Gomez Athletic Clubeko jokalari ohia da entrenatzailea eta luiaondoarraren kideen artean badaude proiekzio handiko gazteak. Adibidez, Aron Yaakobishvili atezaina. Gazte hungariarra FC Barcelonak laga du.

Kirola Aiara Luiaondo

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide