Aiarako Udalak zabor bilketaren tasaren %11,38ko igoera adostu zuen asteartean aho batez. Ezohiko udalbatza egin zuten horretarako eta %10eko hobariak ere onartu zituzten "konpostajea (partikularra zein komunitarioa) egiten dutenentzat, bai eta edukiontzi marroian alta emanda daudenentzat eta erabiltzen dutenentzat ere. Era berean, hobari bera emango zaie elikagai-soberakina biltzen parte hartzen duten erakundeei. Hobari horiek 2027tik aurrera aplikatuko dira, 2026an hobaria eskatzen dutenen norberaren birziklapenari buruzko datuak bildu ondoren", argitu du udal gobernu taldeak.
Araudi europarra eta azpikontratazioaren garestitzea
Igoera horren arrazoia azaltzeko, Aiarako Udalak gogoratu du Europar Batasuneko araudiak ezartzen duela zabor bilketaren zerbitzua autoaskia izan behar dela ekonomikoki. Espainiako estatuan Hondakinei eta lurzoru kutsatuei buruzko 7/2022 Legeak markatzen du helburu hori.
Baina autosufizientzia xede horietaz gain, bestelako aldagaiak egon dira zerbitzua garestitzeko. Izan ere, Gardelegiko zabortegiko hondakinen tratamendurako kanon berriak "igoera handia" izan duela aipatu du tokiko erakundeak. Halaber, Aiaraldeko Kuadrillako bilketa zerbitzuaren lizitazio berriak bikoiztu egin du orain arte ordaintzen zen prezioa.
Aipatu beharra dago Aiarakoa ez dela horrelako neurriak hartzera behartua egon den eskualdeko lehen Udala, Amurriokoak %73,13ko igoera egin beharko du 2026an.