Uste baino asteburu hobea izan du Eneko Martinezek BECen lehiatutako Munduko SuperEnduro Txapelketako proban. Izan ere, hirugarren postuan sailkatu zen Youth 125 kategorian eta podiuma zapaldu zuen.
Bidea ez zen erraza izan, Connor Watson eta Wojtek Walczak gidarien arteko lehian sartu baitzen. Horrela, jokatutako lehenengo lasterketan hirugarren amaitu zuen eta bigarrenean, aldiz, bigarren postua eskuratu zuen, modu estuan Wojtek Walczak gaindituta.
Martinez oso pozik dago, ez baitzuen espero emaitza hain positiboa. Izan ere, aurreko bi lasterketetan ez zen fin ibili. Hori bai, azken podiumarekin Murgako kirolariak motibazioa berreskuratu du eta iragarri du bere helburua izango dela hirugarren izatea Munduko Txapelketako sailkapen orokorrean.
Aiararrak azpimarratu du esperientzia paregabea dela horrelako lasterketa ikusgarrietan ondo aritzea.
Motoclub Aialak antolatuta
Martinezen poztasuna bikoitza izan zen, etxean ospatu ahal izan baitzuen podiuma. Izan ere, Motoclub Aialak antolatu zuen BECeko proba.
Gauzak horrela, murgatarrak aipatu dio Aiaraldea Komunikabideari bere asmoa dela gogor prestatzen jarraitzea, bai fisikoki (astean hiru aldiz entrenatuta) zein psikologikoki, ahalik eta arduratsuen jokatzen eta estrategia onena hautatzen lasterketetan.