Aiarako Udalak, Izoriako Administrazio Batzarrak eta Aranzadi Zientzia Elkarteak indusketa kanpaina berria antolatu dute Babio mendiko tontorrean, Burdin Aroko herri harresituaren sekretuak ikertzen jarraitzeko. Astelehenean hasi ziren lanean eta hilaren 25era arte luzatuko dira.
Lan horren burua Jon Obaldia historialari izoriarra da eta azaldu duenez, aurtengo helburuak honako hauek dira: "Lehenengo harresiaren erorkinak ikertu eta harresia azaleratzea, eta iaz identifikatutako eraikinen aztarnak mugatu eta ikertu".
Berez, hiru egunetan egindakoa positiboki baloratu du aiararrak eta gogoratu du larunbatean bisita gidatua eskainiko dutela azaltzeko zer eraikin topatu dituzten, aurkitutako objektu arkeologikoak eta Burdin Aroko bizimodua nolakoa zen.
Hitzordua larunbat goizean
Bisita larunbatean bertan egingo dute eta 10:30ean elkartuko dira Babioko tontorrean. Derrigorrezkoa ez bada ere, antolatzaileek eskatu diete interesdunei izena emateko aurretik, taldeak eta horniketa hobeto prestatzeko. Hemen egin daiteke inskripzioa, doako jarduera da.
2'018an hasi ziren inguruak industen eta ikerketa zientifiko sakona egin ez ezik (defentsa sistema ulertzeko, nekropolia bilatzeko...), Obaldiak aparteko garrantzia eman dio topatutako jakintza guztiaren zabalpenari. Horregatik, hain zuzen, urtero horrelako bisita bat deitzen dute, gutxienez.
