Hainbat eguneko gorabeheren ostean, Lantenoko sutea kontrolatua dagoela baieztatu du Arabako Foru Aldundiak. Gaur itzaltze lanekin jarraituko dute. "Helikoptero bat erabiliko dute eta suhiltzaile brigadak ere", azaldu du Aiarako Udalak, "bideak zabaldu dituzte sutea egon den tokietara errezago ailegatzeko. Momentuz, egoerak hobera egin du".
Gauzak hala, Etxaurreneko igerilekuak zabalduko direla ere iragarri du tokiko erakundeak.
Gizakiak eragindakoa
Behin egoera larriena pasata, suak zerk eragin zuen aztertzeari ekingo dio Arabako Foru Aldundiak. Izan ere, erakunde horren hipotesi nagusia da sutea ez zela modu naturalean sortu; gizakiek sortu zutela, alegia. "Ezin duguna zehaztu modu boluntarioan sortua izan den edo ez", azaldu du Iñaki Guturbai diputatuak SER irratian eginiko adierazpenetan. Hala ere, gaineratu du sua erabat itzalita egon arte itxaron beharko dela sua zer "kausa antropikok" eragin zuten jakiteko.
Elkartasun txosna gaur gauean Amurrion
Zorigaiztoko gertakari honek, baina, aukera eman du elkartasun keinuak ere azaleratzeko. Amurrioko Txosna Solidarioko kideek jakinarazi dute Lantenoko Kontzejuari emango diotela gaur biltzen duten diru guztia. Horrez gain, kontu korronte bat ere jarri dute dohaintzak jasotzeko: 2095 4408 54 1095224951 (Kutxabank). "Lagundu Llanteno" jarri behar da kontzeptu moduan.
Momentuz, suak ez du kalte pertsonalik eragin, hainbat baserri hustu behar izan dituzten arren. Baina ingurumean izan ditu ondorioak. Kalkuluen arabera, 75 eta 100 baso hektarea inguru erre dira orotara.