Bihar (urtarrilak 4) izango da Agate Deunaren bezpera. Tradizioari jarraiki, eskualdeko hainbat herri eta auzotako bizilagunak aterako dira kalera, makilen kolpeen erritmora etxez etxe oles egitera.
Eskoletan, gaur
Bihar jai-eguna denez, gaur atera dira abestera eskualdeko ikasle eta irakasleak, goizean zehar. Klasean entseatutako abestiak plazaratu dituzte.
Arrankudiaga-Zollon
Musika Eskolak egin du deia Arrankudiaga-Zolloko kale eta auzoetatik abestera irteteko. 16:00etan abiatuko dira, Herriko Plazatik.
Aiaran
Aiarako herri askotan dago errotua Santa Ageda bezperan etxez etxe joatearen ohitura. Lantenon eta Zuhatzan larunbatean aterako dira. Lantenoko eskoletan 9:00etan jarri dute zita, gosaltzeko.
Laudion
Laudion talde bat baino gehiago aterako dira abestera. Arloteek larunbat osoa igaroko dute abesten. 11.30etan hasiko dira Goienurin, eta 20:30etan amaituko dute Zumalakarregi kalean. 17:30etan ikastolako ikasle eta guraso talde bat abiatuko da Basalarrinatik. Askaria egingo dute gero, 19:OOetan, Basalarrinan bertan.
Artziniegan
Egun osoko egitaraua prestatu dute baita Artziniegan. 11:00etan frontoitik abiatuko dira kotxez, inguruko herrietatik (Mendieta, Santa Koloma, Erretes Tudela, Gordeliz, Benta eta Soxoguti) abesteko. Arratsaldeko zazpietan, aldiz, frontoian geratuko dira berriz, Artziniegako kaleetan barrena aritzeko. Umeentzako tailerrak eta txokolatada ere egingo dituzte.
Urduñan
Oilarrak taldeko kideak arituko dira Urduñan makila eskuan dutela abesten. 19:00etan hasiko dira eta ondorengo ibilbidea egingo dute: Licenciado Poza, Nafarroa, Otxomaio, Gernika plaza, Juan de Garay auzoa eta Mikel Deuna.
Orozkon
Agate Deuna abesbatza arduratuko da Orozkoko auzoak girotzeaz. Bi kalejira egingo dituzte: 9:30etan bata eta 16:00etan bestea. Biak ala biak Zubiaur Plazatik abiatuko dira.
Kintoen kalejirak
Kintoak ere aterako dira abestera. Amurriokoak Aiarara joango dira, herriz herri eta etxez etxe dirua eskatzeko. Urduñakoak, aldiz, 8:00etan abiatuko dira. Arrastariako herrietatik arituko dira, hirira itzultzeko gero.