Kartelean ez bazegoen ere, Okondon bizi den borrokalariak beste kirolari bat ordezkatu zuen, eta torneoan garaitu zuen. Bera ez ezik, Julen Aldama, Asier Ispizua eta Eneko Aramendi aiaraldearrak ere igo ziren ringera.
Aratz Garmendia izan zen garailea Zarautzen jokatutako K-1 torneo amateurrean. Garmendiak ez zuen parte hartu behar lehian, baina beste borrokalari batek kale egin zuen eta berak hartu zuen lekua. Lehenengo arerioa, gainera, beste aiaraldear bat izan zen: Julen Aldama, Cape Team-ekoa.
Bien arteko borroka oso parekatua izan zen eta 3. roundera jo behar izan zuten erabakitzeko nork merezi zuen irabaztea (borroka amateurrak 2 roundez osatuta daude). Azken zati horretan Garmendiak prestaketa fisiko profesionala baliatu zuen, eta amurrioarra gailendu zuen. Horren ostean, finalera jo zuen eta han ere menperatu zuen aurkaria.
Eneko Aramendi orozkoarra ere neurtu zen Zarautzen, kartelean bere borroka iragarrita ez bazegoen ere. Orozkoarrak 1. roundean KO teknikoz gainditu zuen arerioa.
Azkenengoz, Asier Ispizua laudioarra Jaime Urdanpiletaren kontra lehiatu zen, lagun eta etxeko kirolaria. Borroka oso berdindua izan zen eta puntuen bitartez erabaki zuen epaileak zarauztarrari ematea garaipena. Arau profesionalekin neurtu ziren, 3 minutuko 3 round beteta.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide
