Luis Muñoz SHESAko zuzendariak adierazi die zenbait hedabideri SAIA baimenak ahalbidetzen duen gas putzua Arratian edo Aiaraldean -hau, da Nerbioi ibaiko zenbait puntutan- egongo dela. Izan ere, eskualdean Arrankudiaga-Zollotik Luiaondoraino egin zituzten proba sismikoak, baita Orozkon ere.
Muñozek azaldu du egitasmoaren nondik norakoak ez dituztela oraindik erabaki eta ez dela ziurra, baina aurten 3 urte gehiagorako luzapena eskatuko dute proiektua gauzatzeko aukera ez galtzeko.
Hori bai, SAIA baimenaren erdia soilik hartuko dute aintzat eta zati handia Aiaraldean kokatuta dago. Putzu horren helburua izango da jakitea lurraldean gasa ustiatzeko parada dagoen.
Frackingaren itzala
Frackingaren aurkako taldeek kontrako jarduera sendoa gauzatu zuten SHESAk proba sismikoak egin zituenean eskualdean, Arratian eta Nerbioi Ibaizabalaren ibilbidean. Izan ere, aurkarien ustez, baimen horren atzean dago Frackinga praktikatzeko asmoa.
Besteak beste, Fracking Ez plataformako kideek gogoratu dute gasa modu arruntean ekoizteko saiakera ugari egon direla, baina inoiz ez direla errentagarriak izan. Horregatik, plataformako kideek sumatzen dute ahalegin berri horien atzean haustura hidraulikoa ezartzeko asmoa dagoela.