Bide berriak zabaltzen ari da mugimendu feminista Aiaraldean. Apirilaren 14an "Feminismoa Aiaraldean" jardunaldia antolatu zuen Ekintzen Faktoriak, eta hurrengo pausoa aurkeztu berri dute: Aiaraldeko emakumeen I. Topaketa Feminista. Ekainaren 9an izango da hitzordua, Laudion: "Asmoa urtero herri ezberdin batean antolatzea da. Lehenbiziko topaketa Aiaraldea Ekintzen Faktoriak Laudioko Gardeako industriagunean duen 4-8 pabilioian egingo dugu".
Saretzea eta ahalduntzea jarri dituzte helburu. "Apirileko jardunaldian eskualdeko feminismoaren egoera, beharrak eta helburuak izan genituen eztabaidagai. Bailara osoko hainbat adinetako 26 emakumeren artean zehaztu genituen aurrera begira lehenetsi beharreko helburuak". Norabide horretan hurrengo pausotzat jo dute ekainaren 9ko zita.
Izen-ematea
Topaketetan parte hartzeko ezinbestekoa izango da izen-ematea, antolakuntza lanak errazteko. Horretarako online bidez bete beharko da formularioa, ekainaren 7a baino lehen. Galdetegian zehazten denez, haurren gunea eta zuzeneko itzulpengintza zerbitzua eskainiko dira; behar izanez gero.
Egun osoko egitaraua
Egun osoko egitaraua prestatu dute auzolanean. Goizean "feminismoa ehuntzen" gosari aurkezpena eta eztabaida egingo dute, Las brindis klown ikuskizunaren ondotik. La familia inventadako antzezleek emango diote hasiera topaketari 10:30ean, eskualdeko emakumeen kultur sorkuntzari espazioak irekiz.
Egitaraua osatzean eskualdeko emakumeen parte hartzea izan da abiapuntu eta helmuga, antolatzaileen aburuz. Tailerrak, solasaldiak eta sorkuntza lanak izango dira osagai nagusia. Uda garaia gertu egonik, "festak, genero harremanak eta feminismoa" uztartuko dituzte eguerdiko solasaldian. Ondoren, bazkaria egongo da. Soldatapekoek 13€ ordaindu beharko dituzte, eta soldatagabeek 10€. Aurreratu dutenez, ez da sorpresarik faltako; partaideek oparia eskuratu ahalko baitute egunaren oroigarri gisa.
Emakumeen sorkuntza nagusi
Arratsaldean, berriz, tailer maratoia egingo dute, 17:00etatik aurrera. Batetik, serigrafia tailerra egongo da, eta buruberokiena bestetik: "Bakoitzak bere arropa edo oihalak ekarri beharko ditu". Iluntzean, berriz, "Energy dance" saioa gidatuko du Marta Mateos okondoarrak. Egunari amaiera emateaz musikari amurrioarrak arduratuko dira: Ilargiak taldearen kontzertua egongo da lehenbizi, eta Pottors Destroyers musika-jartzaileak taularatuko dira segidan.