Oharra plazaratu dute ELA, CCOO eta Independenteek gaur Tubacexen egiten ari diren lan hitzarmenaren bozketa dela eta. 2021. urtera arte indarrean egongo litzatekeen balizko hitzarmen horren onurak nabarmendu dituzte.
Hemen ikusi daiteke oharra osorik:
Alde batetik, langileen soldatetan “Kontsumo Prezio Indizea baino igoera handiagoa” emango litzatekeela azaldu dute. Horrez gain, lanpostuak egonkortuko lituzke hitzarmen berriak, hiru sindikatuen arabera. “87 kontratu mugagabe sortuko lirateke”, azaldu dute.
30 milioi euroko inbertsioa lantegietan
Hori ez ezik, sindikatuek azpimarratu dute zuzendaritzak 30 milioi euroko inbertsioa ere gauzatuko lukeela Amurrio eta Laudioko lantegietan. Errelebo kontratuak 2023. urtera arte luzatuko lituzkete baita, “txandaka lan egiten dutenei finkotasuna ziurtatzeko”.
Seme-alaben eta senideen zaintza
Sindikatuek nabarmendu dutenez, langileek laneko arropa doan garbitzeko aukera izango lukete, eta aukera izango lukete seme-alabak zaintzeko eszedentzia hartzeko, hauek 5 urte bete arte.
Edoskitzea pilatzeko parada ere izango lukete beharginek, eta baita norberak hartzeko dituen 10 egunak 2 orduka hartzekoa ere, senideak medikuaren kontsultara laguntzeko.
Horrez gain, langile guztientzako etengabeko prestakuntza programa gauzatzea barnebiltzen du hitzarmenak.
