"Hausnarketa kolektiboak egiteko gida aurkeztuko dugu Arbizuko topaketetan”

Larunbatean Arbizura joango dira Aiaraldeko neska gazteak. Egun osoko egitaraua antolatu dute. Eskualdean osatutako gogoetak aurkeztuko dituzte bertan.

"Ekainaren 16an Euskal Herriko neska* gazteok batera ekingo diogu", adierazi dute Iraia Pereiro eta Maider Urtaranek. Biak aritu dira, Aiaraldeko beste hamaika emakume gazterekin batera, gogoeta saioetan parte hartzen.

Izan ere, 2016ko abenduan "GaztEraiki" topaketetan feminismoaren ildoa jorratu zuten 200 gazte baino gehiagok. Handik sortu zen udaleku feminista, irailean Ozaetan egin zutena. "Aurten bigarren edizioa antolatuko dugu", aurreratu dute. Irailean gauzatuko dituzte udaleku feministak, baina denbora guzti honetan ez dira geldirik egon: "Euskal Herriko hainbat tokitan hausnartu dugu militantzia ereduaz, mugimendu feministari eta gazte mugimenduari egin ahal diogun ekarpenaz...". 

Larunbatean plazaratuko dute modu kolektiboan orain arte egindakoaren emaitza: "neska* gazteok batera aurrera egiteko tresna bat aurkeztuko dugu". 

Egun osoko egitaraua
Egun osoan zehar egongo da ekintzez gozatzeko aukera. "Gure borroka moldeak eta iruditegiak birpentsatzen" deitu diote ekintzetako bati. Horrez gain, Aingura talde osasun gidaz mintzatuko dira. Dena den, Euskal Herriko mugimendu feministan ez da lehen aldia elkartzen direna: "Bertan parte hatu zuten kide batzuen eskutik helduko zaizkigu hausnarketa hauek ere". Zentzu horretan, asanblada erraldoia egiteko asmoa agertu dute.

Arbizuko topaketetan izena emateko feministagazteak@gmail.com helbidera bidali behar da mezua. Sare sozialetako kontuetan ere egingo dute jarraipena: Facebooken eta Twitterren -@EH_NeskaGazteak-.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide