Plaka bat jarriko dute ostiral honetan -ekainak 22- Arrankudiaga-Zollo eta Arakaldoko udalek, 1937. urtean jazotako bonbardaketa faxistetan hildako auzokideen omenez. 19:00ean izango da zita, Arakaldoko Herriko Tabernan.
Lau bizilagunen izenak jasoko ditu plakak. Maria Luz Ginea Usategi da horietako bat. 25 urte zituela hil zen Ginea, haurdun zegoela. “Hegazkinek Urduñarantz zihoan tren bat bonbardatzeari ekin zioten Aretan. Bidaiariak korrika hasi ziren baina bonbek Maria Luz eta identifikatu gabeko ume bat erail zituzten. Hala azaldu du Txomin Egiluzek. Historiazale arrankudiagarrak egin du Aiaraldean jazotako bonbardaketei buruzko ikerketa, Anton del Rio Bilbaoren lekukotzak baliatuta.
Egiluzen ikerketen arabera, 1937ko ekainaren 14an beste herritar bat hil zuten bonbek: Segundo Elezkano, 17 urteko gaztea. Miñoien kuartela bonbardatu zuten egun horretan, eta bertan zegoen Elezkano, miñoi baten semea baitzen. “Bonba eraikinaren erdian erori zen eta metrallak errekara jaurti zuen gaztea”, azaldu du Egiluzek.
Bartzelonako bonbardaketa
Josefa Okeranzaren izena ere jasoko du ostiralean inauguratuko den plakak. Okeranza ez zen Aiaraldean zendu, Bartzelonan baizik. “Santanderren zegoen familia osoa, eta Bartzelonara ebakuatu zituzten”, aipatu du Egiluzek. 1939ko urtarrilean hirian jazotako bonbardaketa batzuen ondorioz hil zen Okeranza. Balkoian arropa eskegitzen zegoen bonba erori zenean.
![[EFEMERIDEA] Lau ume hil ziren duela 80 urte Aretan, gerra zibileko granada baten eztandaren ondorioz](https://aiaraldea.tok-md.com/argazkiak/wEh/cache/indizea_tokikom_735x413.jpg)
![[EFEMERIDEA] Duela 80 urte erail zuten hegazkin naziek Segundo Elezkano auzokidea](https://aiaraldea.tok-md.com/argazkiak/yMG/cache/BW-photo-Junkers-Ju-87B-Stuka-K88-(29x11)-Condor-Legion-Spain-May-30-1939-01_tokikom_735x413.jpg)
