Ekainean aurkeztu zuen Aiaraldea Hedabideak "Udari klik" argazki lehiaketa. Aurtengo berrikuntza, irabazlea boto bidez erabakitzea izan da. Hain zuzen, webguneko bisitariek aukeratuko dute boza emanez lanik onena. Gainera, urriko lehen hamabostaldiko Aiaraldea Hemen egunkarian 8 argazki baloratuenak plazaratuko dira. Dagoeneko 80 argazkitik gora aurkeztu dira.
7 egun lanak aurkezteko
Lehiaketa bi fasetan gauzatuko da. Irailaren 21 arte izango du aukera argazkia bidaltzeko Aiaraldeko edozein herritarrek. Horretarako hiru bide proposatu dira: aiaraldea.eus ataritik igortzea lana, sare sozialetan irudiarekin batera @aiaraldea aipatzea (Facebook, Twitter edota Instagramen), edota erredakzioko telefonora bidaltzea (688848152). Parte hartzaileak bere izen-abizenak, argazkiaren izenburua eta emaila zehaztu beharko ditu.
Webguneko bisitariak epaile
Irailaren 22tik 30era egongo da "Udari klik" atalean bertan argazkiak bozkatzeko aukera. Hortaz, urriaren 1ean jakingo da irabazlea. "La Casa de las cascadas" egurrezko etxeetan bi lagunentzat gau bateko egonaldia izango da saria.