Igandean amaitu zen Udako Argazki Lehiaketako argazkiak bozkatzeko epea. Endika Arribas eta Ainara Berrocal laudioarren irudiak jaso ditu boto gehien: 169. Gauzak hala, eurek jasoko dute lehiaketaren saria: "Las casas de las cascadas" ekoturismo gunean 2 lagunentzat gau bateko egonaldia.
Anayeteko ibonetan -glaziar jatorriko lakuak- egin zuten argazkia. “Bederatzi pertsona joan ginen bertara bidaian, bi aiaraldear eta zazpi gipuzkoar”, azaldu dute. Hori dela eta, argazkia “lan-kolektibo baten emaitza” dela nabarmendu nahi izan dute, kide guztiek hartu baitzuten parte egitasmoan.
Eneko Toquerok Suitzan eginiko argazkia bigarren postua geratu da, 117 botorekin. Suitzako Matterhorn mendia agertzen da irudian. “Mendi hori da Tobleroneren ikurra. Gauzak hala, familiarekin bertara joan nintzenean, argazki hau ateratzea bururatu zitzaidan”, azaldu du Toquerok.
Oskar Sanchez Aldama geratu da hirugarren postuan. “Costa Bravan egin genuen argazkia”, azaldu du, “itsasoko izar asko omen zeuden toki batera eraman gintuzten. Hasieran ez genituen topatzen, baina azkenean lortu genuen batekin argazkia egitea”.