Urriaren 27an, larunbatean, izango da "Feministen herria". Emakumeen mundu martxaren amaierarekin batera, Bilboko Areatza bihurtuko dute topaleku. Hain zuzen, egun osoko egitaraua antolatu dute.
11:00etan hasiko da Emakumeen Mundu Martxako kideekin solasaldia, gosari feministaren ondoren. 12:30ean "Feministon bakea eraikitzen" mahai-ingurua egongo da, eta 13:00etan "memoria feminista plazara" performancea.
Segidan, bazkaria egingo dute. 17:30ean iragarri dute manifestazioa, Arriaga plazatik abiatuta. Kontzertuek itxiko dute egitaraua. 30 proiektu feminista baino gehiago ezagutzeko parada egongo da, antolatzaileek adierazi dutenez.
Aiaraldeko Mugimenduko Feministak goizez eta arratsaldez bertaratzeko deia luzatu du. Horretarako trenean elkarrekin joateko hitzordua jarri dute: Urduñatik 11:21ean aterako den trena hartuko dute goizean, eta 16:21ean abiatzen dena arratsaldean.
Aiarako Udalak, bere aldetik, autobusa jarriko du herritarren eskura ekimenean parte hartzeko. Urriaren 25 arte egongo da apuntatzeko aukera. "Helburua elkarrekin joatea da bertako ekintzak ikusi eta parte hartzeko", adierazi du Miren Urresti Aiarako Kuadrillako berdintasun teknikariak. Izena emateko mezua bidali behar da cayala.miren@ayto.araba.eus helbidera, edo 686587889 zenbakira deitu.
Otsemeak taldeak mobilizaziora buruberokiak eramateko gonbita luzatu du sare sozialetan. Bestalde, Euskal Herriko neska* gazteok egitasmoak Aingura eta Lema proiektuak aurkeztuko ditu. Buruberoki tailerra ere egingo dute Areatzan. Horregatik, tailerrerako kamiseta zaharrak eramateko eskatu dute.
Astelehenean, Aiaraldeko Mugimendu Feministaren asanblada
Urriaren 30ean egingo du Aiaraldeko Mugimendu Feministak hurrengo bilera irekia, 18:30ean Aretako Kultura Etxean.