Pasa den astean iragarri bezala, Aiarako Kuadrillak helburu berriak bete nahi ditu epe motzean birziklapenari dagokionez, materia organikoaren esparruan bereziki. Hori dela eta, 5 jarduera egingo ditu azaroan.
Hasteko, ostiralean lehiaketa deitu dute jakiteko nork ekoizten duen konpostik onena. "Dastatze" lehiaketa izendatu dute eta 15 lagin hartu eta aztertuko dituzte -kilo erdikoak gutxienez-, Arespalditzako Gizarte Zentroan. Parte hartzeko epea bihar agortuko da eta horretarako Aiarako Udaletxera deitu beharra dago -945 399 013-. Irabazleak tokiko produktuez osatutako saskia eskuratuko du.
Larunbatean Artziniegara mugituko da ekimena. Hitzaldia eskainiko dute: “Konpostajea eta nekazaritza ekologikoa: nekazaritza ekologikoaren oinarriak eta izurriteen aurreko estrategia ekologikoak”. 11:30ean hasiko da solasaldia eta 2 ordu iraungo du. Artziniegako udaletxeko osoko bilkuren aretoan izango da eta 50 lagunentzako tokia egongo da. Aurrez izena emateko Artziniegako Udalera deitu beharra dago: 945 396 353.
Astebete beranduago, azaroaren 24an, "Auzo konpostajea eta ekonomia zirkularra" izango dute hizpide Okondoko Eskolan, 11:30ean. Aurretik inskripzioa egitea beharrezkoa izango da, azaroaren 23a baino lehen, udaletxera deituta: 945 898 023.
Bukatzeko, zizare-konpostajea nola egiten den irakatsiko dute Laudion. Azaroaren 30ean, ostiralean, izango da zita, 18:00etan Kultura Etxean. 94 403 4800 telefono zenbakira deitu behar da izena emateko.
