aiaraldea.eus

Euskal preso, iheslari, eta deportatuen aldeko ekimen ugari egingo dituzte Aiaraldean, Gabonen testuinguruan

Erabiltzailearen aurpegia Aimar Gutierrez   Politika  Aiaraldea

Bada garaia, presoak kalera! lemapean elkartasun ekintza ugari antolatuko dira Aiaraldean Gabon jaien testuinguruan. Elkarretaratzeak eta espetxeetara martxak egingo dituzte eskualdeko hainbat herritan.

Euskal preso, iheslari, eta deportatuen aldeko ekimen ugari egingo dituzte Aiaraldean, Gabonen testuinguruan
Iazko gabonetan Ibon Iparragirre larriko gaixotutako Euskal Preso Politikoaren aldeko elkarretaratzeak egin ziren Aiaraldean. / Aiaraldea.eus | Ikusi handiago | Argazki originala

Euskal preso, iheslari eta deportatuen aldeko elkartasun ekimen ugari egingo dira Aiaraldean hurrengo asteetan.

Elkarretaratzeak
Amurrion, urteko azken ostiralaz baliatuz, abenduaren 28an 20:00etan, elkarretaratzea egingo dute Juan de Urrutia plazan. Aurretik, abenduaren 21ean, Zaraobe Institutuko ikasleek Ikasleok zuekin! lemapean kontzentrazioa egingo dute ikastetxean 11:00etan.

Urduñan eta Orozkon ere egingo dituzte presoen askatasuna exijitzeko elkarretaratzeak abenduaren 28an.

Laudion ere burutuko dituzte mobilizazioak. Abenduaren 24rako, Olentzeroren kalejira egunerako, deitu dute lehenengoa. 18:00etan elkartuko dira Laudioko Herriko plazan. Abenduaren 31n, 19:00etan Herriko plazan berriz elkartzeko deia luzatu diete eskualdeko herritar guztiei,  Euskal preso, iheslari eta deportatuen aldeko brindisean.

Espetxeetara martxak
Abenduaren 22an eta 31n “Kalera” dinamikaren deialdiarekin bat egin eta Zaballa eta Basauriko espetxeetara martxetara batuko dira Aiaraldetik. Abenduaren 22an Arabako Zaballa espetxera bertaratzeko kotxe-kedadak antolatu dituzte Laudiotik eta Amurriotik 10:00etan. Laudion Latiorroko parkingean jarri dute hitzordua, Amurrion, aldiz, Txokogorri taberna parean.

Abenduaren 31n,, Basauriko espetxera joateko kotxe-kedada 11:30ean jarri dute Amurrioko Txokogorri tabernatik. Bertan dago Julen Ibarrola Amurrioko bizilaguna urtebeteko espetxe-zigorra betetzen.

Julen Ibarrolaren urtebetetzea
Abenduaren 24an Julen Ibarrola gazte amurrioarrak urteak beteko ditu. Iragan otsailetik Basauriko espetxean dago preso urtebeteko kondena betetzen errotulagailu batekin egindako margoketa baten harira. Juan de Urrutia plazan elkartuko dira senide eta lagunak arratsaldeko 18:00etan Ibarrola eta gainontzeko euskal preso politikoen aldeko argazki herrikoia ateratzeko.

Bilboko manifestazio nazionala
Urtarrilaren 12an Sare herritarrak manifestazio nazionala deitu du Bilbon “Orain Presoak!” lelopean. Bilboko mobilizaziora deitzen kalejirak eta bestelako ekintzak antolatuko dira Aiaraldeko herrietan. Urtarrilaren 3an Amurrioko Txokogorri tabernan Ilargiak talde akustikoak eskainiko duen kontzertua dago jarduera horien artean, besteak beste.

 

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa