Arabako Foru Aldundiak jakinarazi du pisu berria irekiko duela aurten Aiaraldean buru gaixotasunak dituzten pertsonentzako, 175.000 euro baliatuta. Etxebizitzak sei pertsonentzako tokia izango du eta urte erdi barru egongo da martxan, Aldundiaren aurreikuspenen arabera.
Horrez gain, Bizkaiko Aldundiarekin negoziatuko dute, Urduña, Orozko, Arakaldo eta Arrankudiaga-Zolloko herritarrek ere izan dezaten Arabako baliabideez gozatzeko aukera.
Sinadura bilketa
Asasam elkarteko kideak pozik azaldu dira albistearekin. Gaur egun hiru pertsonentzako espazioa duen pisua kudeatzen dute elkarteko kideek, eta sinadura bilketa abiatu zuten iaz Aldundiari baliabide gehiago eskatzeko, “etxebizitza zerbitzu duina” eskaini ahal izateko. Arrakasta nabarmena izan zuen ekimenak, 3.766 sinadura bildu baitzituzten guztira.
15 pertsonentzako etxebizitza
Horrez gain, Aldundiak hedabideetan jakinarazi du beste etxebizitza bat irekiko duela eskualdean aniztasun funtzionala duten pertsonentzako. 15 erabiltzailerentzako tokia izango du azpiegitura berri horrek eta Aiaraldetik egunero Gasteizeko Etxebidea egoitzara doazen pertsonei bideratua egongo da.