4. aldiz igo zen igandean Josu Apraiz laudioarra Ugaoko Herri Kroseko podiumera. Aurtengo edizioan 3. postua erdietsi du eta 2015ean, 2017an eta 2018an, ordea, 2. izatea lortu zuen.
Emaitza hori eskuratzeko lan gogorra egin behar izan zuen laudioarrak. Ugaoko Herri Krosak 5 kilometroko ibilbidea du eta zirkuitua 3 aldiz betetzen dute. Hasieratik Apraiz lehenengo postuan jarri zen eta 4 lasterkarik osatu zuten burua. 500 metro inguru falta zirenean lasterketa amaitzeko, laudioarrak erritmo aldaketa egin zuen lehiakideak atzean uzteko, baina ez zuen lortu guztiz gailentzea.
Ondorioz, Gorka Blascok irabazi zuen eta Sergio Mijancosek gurutzatu zuen bigarren helmuga. Josu Apraizek 3. postua bereganatu zuen 16 minutu eta 24 segundoko marka bete ostean.
Laudioarra ez zen izan aiaraldear bakarra Ugaoko lasterketan. Endika Arrazuria 6. izan zen eta Iñaki Galindez 9. izan zen gizonezkoen artean. Aiaraldeko emakumezkoek ere sailkapen onak lortu zituzten; Helene Arzuaga laudioarra 8. izan zen, Laura Mas Molina amurrioarra 9. eta Aitana Izagirre zollotarra 12., esaterako.