[IRITZIA] Bi langile hil ostean, mimo bat jarri du zuzendaritzak Tubacexeko lantegietan istripuak ekiditeko

Azken hilabeteetan Laudioko bi langile hil ostean Tubacex enpresako eskualdeko lantegietan, giroa ez da onena han, aurreikusi daitekeenez.

Testuinguru horretan, alde guztiek tentuz jokatu beharra dute, txinparta txiki batek sutea ez eragiteko. Dena den, zuzendaritzak, antza, ez du hori ulertu. Izan ere, azken asteetan, segurtasuna sustatzeko lantegiko postuetan, mimo bat kontratatzea bururatu zaio langileei kargu hartzeko.

Txantxa badirudi ere, ez da, inondik inora. Zuzendaritzak mimoa ekarri du Laudioko eta Amurrioko fabriketara, eta han egon da azken asteotan. Bere eginkizuna erraza zen, norbanako babeserako ekipoa -EPI- ez zuen beharginari txartel horia erakustea, alegia.

Jar gaitezke momentu batez Tubacexeko langileen azalean: azken hilabeteetan bi kide hil dira bere ardurak betetzen zituzten bitartean. Heriotza horiek ez dute inolako harremanik izan norbanako babeserako elementuekin, baizik eta bestelako arazo estrukturalekin: ordezkapen faltak oporretan, azpiegitura zaharrak, prekarietatea...

Hala ere, enpresak erabaki du mimoa jartzea paseatzen langileei "errieta egiteko", nolabait iradokitzeko segurtasun eza beharginen errua dela. Egora benetan lisergikoa.

Hori ez ezik, sindikatuek eskatutako prebentzio eta segurtasun neurriei ere uko egin die zuzendaritzak. Berdin izan zaie bi langile hiltzea udan, dirudienez. Antza, eurek ez dute ezer aldatzeko beharrik, eta, egia esanda, erakunde publikoek ere ez dute horrelakorik iradoki. Argazkiak egiteko edo telebistan agertzeko Tubacex enpresako lantegietatik noizean behin igarotzen diren ordezkari publikoek ez dute parte hartu istripuak salatu dituzten manifestazioetan.

Aurrekari horiekin, norbaiti arraroa egiten zaio bihar sindikatuek 24 orduko greba deitzea? Niri behintzat ez. Berez, mimoaren aferak txantxak egiteko balio izan badu ere, segurtasuna lanean kontu serioa da. Greba bat bezain serioa.