Larunbatean estreinatuko dute Artzaintza Gorbeian. Milaka urteko lanbidearen iragana, orainaldia eta etorkizuna dokumentala. Bilboko Kale Nagusian dagoen BBK aretoan izango da zita, 19:00etan.
Aztarnak dinamizatu du filmaren grabaketa. “Lanbide zahar honen historia ageri da dokumentalean, izan dituen aldiak, orainaldia eta bereziki etorkizunari begira dituen aukerak”, azaldu dute elkarteko kideek.
Zehaztu dutenez, laurogei urtetik gorako hainbat artzain agertuko dira pantailan: “Jose Ereño, Jose Mari Olabarria, Javi Aldama, Luis Larrea, Juantxu Astondoa edota Enrike Etxebarria”.
Emakumeak ere aintzat hartu dituzte, nabarmendu dutenez. “Artzaintzaren garapenean eta iraupenean izan duten garrantzia eztabaidaezina baita aldiz aldi, eta horrelaxe erakutsi nahi izan dugu”.
Artzain gazteagoak ere agertzen dira pelikulan: Belen Etxebarria, Aitor Azkueta, Puy Arrieta, Jon Etxebarria edota Maribel Alava. “Beste era bateko adituek ere ematen dituzte euren iritziak, aldarrikapenak eta proposamenak; horrela, landa garapenean adituak, biologoak, politikariak eta beste profesional batzuk ere agertzen dira”.
Helburuak
Azaldu dutenez, hainbat helburu izan dituzte dokumentala egiterako orduan. Artzaintzaren “errealitatea” ezagutzera ematea du xede ikus-entzunezkoak, baita artzainen figura “duintasunez janztea” ere.
Dibulgaziorako tresna gisa osatu dute dokumentala, artzaintzak mendietan duen garrantziaz kontzientziatzeko, “gazteen artean batez ere”.
Horrez gain, etorkizunera begirako dokumentala ere bada, “artzaintza modernorantz bidea egiteko formulak aurkitzeko tresna” izatea nahi baitute egileek.
Telebista eta jaialdiak
Larunbateko estreinaldira gerturatzeko betarik ez dutenek izango dute aurrerago filma ikusteko aukera. Telebista kateetara eta jaialdietara bidali nahi dute.
Proiekzio batzuk zehaztu dituzte dagoeneko: “Abenduaren 29an Zeanurin ikusi ahalko da eta Gasteizen ere estreinatuko dugu, baina data zehaztu gabe dago oraindik”.
Prozesu luzea izan da dokumentalaren grabaketa. Egitasmo ugari egin dituzte azken hilabeteetan proiektua finantzatzeko.