Atzo onartu zuen Espainiako Gobernuak Markixanako araztegia eraikitzeko prozedura abiatzea. Azpiegitura sortzeko 18,8 milioi euro inbertitzea aurreikusi dute.
Basaurbeko araztegia eraikitzeko prozesua ere abian dago, iragan astean onartu baitzuten. Lanak hemendik hilabete batzuetara hasiko lirateke eta, gauzak hala, araztegia hemendik lau urtera egongo litzateke martxan.
Araztegiak Amurrio, Murga, Olabezar eta Luiaondoko urak jasoko ditu. Orotara, 15.000 biztanleren beharrak asetuko dituela kalkulatu dute.
Tratamendu biologiko bat baliatuko dute urak arazteko, “ultrafiltraziozko zuntzak” baliatuta. Prozedura horrek koipeak kentzen ditu lehenbizi, eta bakterien bidezko tratamendu bat aplikatzen da gero, kutsadura biologikoa kentzeko. Lokatzak kentzeko filtrazioa ere burutzen da. Modu horretan ateratzen dituzten hondakinak zementua fabrikatzeko edo ongarri gisa baliatu ahalko dira.
9.900 metro kubiko ur urtean
Egunean 9.900 metro kubiko ur prozesatu ahalko dituzte araztegiek. Behin martxan jarrita, 2 milioi euroko inbertsioa egin beharko dute erakunde publikoek urtero, azpiegitura osoa mantentzeko.
