Gutun mordoa jaso dituztela eta, pozik azaldu dira Olentzero eta Maridomingi. Asteak igaro dituzte mendian lanean, Aiaraldean zein Euskal Herrian opariak banatu ahal izateko. Aiaraldeako bulegoan argia piztuta zegoela-eta, sartzea erabaki dute.
Aiaraldeko umeek zer eskatu dieten galdetuta, denetariko gauzak prestatu dituzte, aitortu dutenez. Irudimena, baina, ez zaie falta haurrei Maridomingiren esanetan: "Aurrekoan zuhaitzaren azpian opariak bilatzeko Altxorraren bila jokoa antolatzeko eskatu zigun ume batek". Merkatari elkartearen ekimenez, telefonoz etxeetara deika aritu dira aurten. "Asko harritzen dira, oso polita izaten da", dio Olentzerok. Afalordua baliatu dute horretarako, baserrian lan handia izan dute eta. "Baserria gobernatu behar dugu, ikatza prestatu, animaliei jaten eman... gutunak irakurrita, dena prest utzi dugu".
Bitxikerien artean, Madrilera deitu zutenekoa aipatu du Maridomingik: "Madrileko familiari goraintziak emateko deitzea eskatu zigun guraso batek gutunean, eta sekulako poza hartu zuten". Askotan, etxekolanak egiten harrapatu dituzte gazteak, eta horregatik, irakasleei zeregin gutxiago bidaltzeko esan diete, "haurrek kalean jolasteko denbora gehiago behar dute".
Oparien artean panpinak, bideo-jokoak eta tabletak izan dira nagusi: "Opariarekin batera ahalik eta makina horiekin ahalik eta gutxien jolasteko mezua bidali diegu". Euskaraz informatzen jarraitzeko eskatuz agurtu dira, zoriona lau haizetara zabaldu ondotik.