Ate joka daude inauteriak. Hori dela eta, aratusteetako argazki lehiaketa antolatu du Aiaraldea komunikabideak, beste urte batez. Martxoak 2 arte iraungo du dinamikak. Izan ere, otsailaren 25 arte egongo da argazkiak bidaltzeko aukera, eta astebeteko tartea izango dute erabiltzaile zein irakurleek euren begitara lanik ederrena aukeratzeko. Hala, boto gehien eskuratzen dituen egilea izango da garailea.
Parte hartzeko moduak
#AratusteakAiaraldean traola erabiliko du komunikabideak datozen egunetan mozorroen festaren jarraipena egiteko. Twitter, Facebook zein Instagramen gako hori baliatzen duten argitalpenak zuzenean txertatuko dira lehiaketan.
Horrez gain, whatsapp bidez (688848152 da erredakzioko telefono zenbakia) eta emailez (erredakzioa@aiaraldea.eus) ere bidali ahalko dira irudiak.
Dena den, zuzenean argazkiak igotzeko aukera ere egongo da, hemen klikatuta.
Partaide bakoitzak nahi beste argazki aurkeztu ahalko ditu, baina izen-abizenak eta harremanetarako bideak azaldu beharko dizkio hedabideari.
Bozketa fasea
Aurreko urteetan bezala, otsailaren 25etik martxoaren 2ra luzatuko da boto fasea. Hala, edonork izango du boto bidez irudi bat saritzeko aukera. Martxoaren 3an jakinaraziko da ekimenaren irabazlea.
