Aiaraldea Ekintzen Faktoria, kitxuaren biziberritzean bidaide

Iparraldeko Teknika Unibertsitatean ari dira ikastaroa eskaintzen. / Garabide Elkartea

Ekuadorrera joan da Gartzen Garaio Atxurra, Aiaraldea Ekintzen Faktoriako kidea. Bertako Iparraldeko Teknika Unibertsitatean dago, Kitxuaren Biziberritze Estrategietako Lehen Nazioarteko Ikastaroan parte hartzen. Garabide Elkarteak eta Sisariy antolakundeak bultzatu dute ekimena.

Kitxuaren biziberritzean aktiboki parte hartuko du Aiaraldea Ekintzen Faktoriak. Proiektuko kidea den Gartzen Garaio Atxurrak Ekuadorreko iparraldeko Ibarra hirian igaroko ditu hurrengo hiru asteak, Garabide Elkarteak eta Sisariy kitxuen antolakundeak gidatutako Kitxuaren Biziberritze Estrategietako Lehen Nazioarteko Ikastaroan.

Euskal Herriko beste erakunde batzuetako ordezkariak eta adituak ere bertaratu dira topaketara: Uri Ruiz hezkuntzako aditu gisa, Soziolinguistika Klusterreko Belen Uranga, Elhuyar Fundazioko Imanol Azkue, AEKko Mertxe Mugika eta Andoaingo Udaleko Patxi Baztarrika. "Aktibazio sozialean eta komunikabideen esparruan Aiaraldean pilatutako esperientziak partekatzea" izango da Faktoriaren helburua ikastaroan.

45 ikasle
Guztira, 12 kitxua eta 6 euskaldunek eskainiko dituzte klaseak. “Zenbakitara ekarrita 120 klase ordu, 18 irakasle eta 45 parte-hartzaile estrategiko biltzen ditu ikastaroak”, azaldu dute Garabide elkarteko kideek. Nabarmendu dutenez, kitxua lurretan egingo den mota honetako lehen ikastaroa izango da, eta “bistakoa” da piztu duen interesa.

“Hasiera batean 30 plaza eskaini ziren eta jasotako eskaera kopurua bikoitza izan denez eskaintza 45 plazara zabaltzea lortu da” dio Elvis Tuquerresek, Sisariy kitxuen antolakundeko koordinatzaileak. Azaldu dutenez, sei zatitan egongo da banatuta ikastaroa. “Lehen biak teorikoagoak dira, soziolinguistikaren oinarriak jorratuko dira eta ondotik kitxuaren biziberritzerako plan estrategikoa diseinatuko da. Hurrengo hiruak praktikara bideratuagoak daude. Taldea hiru espezializaziotan zatituko da eta biziberritze proiektu zehatzak landuko dituzte taldeka, azken moduluan proiektu horiek aurkeztu eta aurrez adostutako plan estrategikoaren barruan kokatzeko”.

 

Ekuadorreko iparraldean dago Gartzen Garaio Atxurra Aiaraldea Ekintzen Faktoriako kidea, kitxuaren biziberritzerako nazioarteko ikastaroan

 

Nabarmendu dutenez, ikastaroan izena eman duten 40 kideak eragiteko gaitasun handia duten pertsonak dira, “hezkuntzako arduradunak eta irakasleak, udaletako teknikari eta zinegotziak, kazetariak eta kultur eragileak baitira”.

Garabide elkarteak 15 urte bete ditu hizkuntzan oinarrituta kooperazioa sustatzen. Orain arte ikastaro ugari antolatu dituzte Euskal Herrian, eta 20 kitxua aktibista baino gehiago trebatu dituzte horrela. Aktibista horiek dira, hain zuzen, Sisariy antolakundea sortu zutenak, duela bi urte.

Hala ere, Garabideko kideek nabarmendu dute ezagutza trukea ez dela alde bakarrekoa. “Proiektu honek Euskal Herrira begira ere soka luzea ekartzea espero dugu, kitxuengadik ikasitakoa etxekotzea da gure erronka”.

Jarraipen berezia
Gartzen Garaiok bidaiaren nondik norakoen jarraipen berezia egingo du, Aiaraldea.eus atarian.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide