Zorrozako lan heriotza

8,7 metroko altueratik erori zen Zorroza enpresan hildako langilea, gutxieneko segurtasun neurririk gabe

Asteartean bertaratu ziren Ertzaintza eta Osalan lantegira. / Aiaraldea.eus

Osalanek hasierako txostena osatu du eta nabarmendu du 8,7 metroko erorketa izan zuela behargin senegaldarrak. Ez zuen arnesik eta eskuko eskailerarekin igo zen teilatura.

Aiaraldea hedabideak aukera izan du Osalanek astelehenean jazotako lan heriotza dela eta egindako hasierako txostena irakurtzeko eta zenbait datu argigarri jasota daudela ikusi du. 

Hasteko, osasun erakundeak adierazi du 8,7 metroko altueratik jauzi zela Zorroza enpresan zendutako langilea. Segurtasun adituek Aiaraldea hedabideari azaldu diotenez, 2 metroko altuera igarota lan egin beharrez gero, arnesa erabili behar da, besteak beste.

Ordea, langile senegaldarrarentzat zegoen bitartekoa eskuko eskailera bat izan zen. Antza, teilatu-hodiak aldatzea izan zen bere eta beste hiru beharginen eginkizuna.

Lan prebentzioan aditua eta LABeko kidea den Peli Ortiz de Zaratek ziurtatu du horrelako kasuetan araudiak ez duela baimentzen eskaileraren erabilera, plataforma igogailua baliatu behar baita.

Leire Heredia ELA sindikatuko lan prebentzioko arduradunak, aldiz, aipatu du gutxieneko trebakuntza behar dela 2 metroko altuera gainditzen denean. Hildako langileak astebete bakarrik eman zuen Zorroza enpresan. Herediak gehitu du horrelako ardurak zehaztuta egon behar direla eta ezin zaizkiola edonori esleitu.

Elementu aldaketa teilatuan
Osalanek beste datu deigarri bat jaso du bere txostenean. Izan ere, iradoki du teilatuan elementuak aldatu dituztela istripua gertatu zen tokian, ezbeharra gertatu eta gero.

8,7 metroko altuera
Aiaraldea hedabidea asteartean Ertzaintzarekin harremanetan jarri zenean lan istripuaren berri izateko, poliziaren komunikazio zerbitzuak aipatu zuen 4 metroko erorketa izan zuela langileak.

Gaur berriro horri buruz galdetuta, Ertzaintzak argitu du 112 telefonora larrialdiaren berri emateko deitu zutenek ez zutela zehaztu zenbateko altueratik jauzi zen langilea. Gero, larrialdi zerbitzuek jaso zuten 4 metroko datua, behin lantegira bertaratuta.

Azkenean, Osalanek zehaztu du 8,7 metroko altuerako erorketa izan zela benetan. 

Erlazionatuak

Zer gertatu da Zorroza gestión de residuos enpresan? Lan heriotzaren argi eta ilunak

Aiara Murga

Istripuaren ordua, astelehen gauean ateratako zaborra, langileen lan baldintzak, udalak irekitako ingurugiro espedientea... zalantza eta galdera ug...
Zorrozari "egia osoa" eskatu diote lan heriotza salatzeko eginiko mobilizazioan

Amurrio

100 lagun inguru mobilizatu dira gaur Amurrion, Zorroza gestión de residuoseko lan heriotza salatu eta enpresari "egia osoa" exijitzeko.
Zorrozako egoera: 10 orduko nahitaezko lanaldiak, hitzezko tratu txarrak eta prestakuntza gabezia

Aiara Murga

LAB sindikatuak ohar baten bidez salatu ditu Murgako lantegiaren barruan bizi diren lan baldintzak. Langile bat hil da bertan astelehenean gertatut...

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide