Espainiako Gobernuak, atzo onartutako alarma egoeraren testuinguruan, estatu osoko herritarren mugimenduak mugatu ditu, gaur gauean Pedro Sanchez presidenteak prentsaurreko batean adierazi duenez. Neurri hauek bihartik aurrera jarriko direla indarrean esan du presidenteak eta hurrengo 15 egunetan zehar luzatuko dira, gutxienez.
Neurriek “ondorio” ekonomiko eta sozial garrantzitsuak izango dituztela adierazi ostean, biztanleak etxetik ateratzeko debekua plazaratu du, betiere lanera, farmaziara, estankoetara, bankuetara, gasolindegietara, supermerkatuetara edo lehenengo beharreko antzeko zerbitzuetara joateko ala bueltatzeko, lanera joateko edo zaintza behar duen pertsona batengana gerturatzeko ez bada.
Estatu osoko osasun eta segurtasun zerbitzuak, Osakidetza eta Ertzaintza barne, Gobernu Zentralaren menpe geratuko direla ere gehitu du presidenteak eta Indar Armatuak ere erabiltzeko prest daudela esan du. Hezkuntzari dagokionez, Espainia osoko eskola, institutu eta unibertsitateko jarduerak online egiten jarraitu beharko dira. Minoristen negozioak, aipatutako lehengaietakoak izan ezean, bertan behera geratu dira ere.
Lehengaien hornidurari dagokionez, Osasuneko ministroak ikuskapen pertsonalak egiteko boterea izango du, eta Gobernuak elikagai hornidura ziurtatuko duela zehaztu du Sanchezek. Distantzia erdiko tren zerbitzua ere erdira murriztuko da. Hartutako neurri hauen segurtasuneko indarrek betearaziko dituzte. Amaitzeko, biztanle guztiek “koordinatuta eta batuta” jardutea eskatu du Sanchezek, “aste zailak” izango baitira.