Artziniegan eta Arrankudiaga-Zollon etxetik irten ezin diren pertsonentzako laguntza sarea antolatu dute. Artziniegako Udalak ohar batean adierazi duenez, “arrisku handiena duten biztanleak, adinekoak, gaixoak edo premia bereziak dituztenak" laguntzea izango da helburua, gutxienez bi aste hauetako alarma egoerak iraun bitartean.
Elikagai Bankuko boluntarioen taldeak eta Otsati Elkarteak bultzatuta, elikagaiak eta lehen mailako beharrak, baita farmaziako produktuak ere, egunero erostea izango da helburua. Zerbitzua behar izatekotan, 616 098 296 izango da kontakturako telefonoa.
Udalak, bestalde, 945 396 353 telefono zenbakia jarri du eskuragarri tokiko erakundearekin kontaktuan jarri nahi diren pertsonentzako, 08:00etatik 15:00etara. Ordu horietatik kanpo, larrialdi zerbitzuetarako telefonoa 600 761 107 izango da.
Arrankudiaga-Zollon ere etxetik atera ezin diren pertsonentzako zerbitzua abiatu dute, erosketak haien etxeetara eramateko helburuarekin. Gainera, familiartekoak zaintzeko laguntza ere eskainiko da zerbitzu honen bidez. Aipatutako egoeran egotekotan edo iniziatiban parte hartu nahi izatekotan 663 531 973 telefonora deitu beharko dute biztanleek.
Amurrio Trail elkarteak ere kolektibo honentzako laguntza taldea abiatuko du. Ezarritako portaera protokoloa era zorrotzean bermatuko dutela adierazi eta gero, behar izatekotan edo parte hartu nahi izatekotan, 636 563 324 eta 656 973 011 telefonoak jarri dituzte eskuragarri.
Urduñak ere biztanleen arteko laguntza zerbitzua abiatu dute. Koronabirusak aurkako neurriek bereziki kaltetutako kolektiboek eta taldean parte hartu nahi dutenek 625 258 139 telefono zenbakira deitu beharko dute.
Orozkon, berriz, “pertsona nagusiak, gaixo daudenak, umeak eta laguntza behar duten edozein herritar laguntzeko” laguntza sarea ere martxan jarri dute. 946 339 633 zenbakia jarri dute eskuragarri Udaletik zerbitzu hau behar izatekotan. Era berean, boluntario bezala parte hartu nahi dutenek, telefono zenbaki berdinera deitu beharko dute, edo honako bi helbideetara idatzi: administrazioa.orozko@bizkaia.org edo alkatetza.orozko@bizkaia.org.