aiaraldea.eus

Koronabirusa duen Tubos Reunidoseko langile batek bere esperientzia zabaldu du, jendeari zuhurtzia eskatzeko

Erabiltzailearen aurpegia Julen Solaun Martinez   Osasuna  Aiaraldea

Gurutzetan ospitaleratu zuten eta handik idatzi du Covid-19aren ondorioz bizi izandako esperientzia.

Koronabirusa duen Tubos Reunidoseko langile batek bere esperientzia zabaldu du, jendeari zuhurtzia eskatzeko
Gurutzetan ospitaleratuta egon da langilea. / Wikipedia | Ikusi handiago | Argazki originala

Koronabirusa dela eta Gurutzetan ospitaletatuta dagoen Tubos Reunidoseko langile batek (bere anonimotasuna mantendu nahi izan du) gaixotasunarekin izan duen esperientzia kontatu zuen atzo, martxoak 19, idatzitako ohar batean.

Langileak azpimarratu du egoera oso larria dela eta eskatu dio jendeari serio hartzeko gaixotasuna. 44 urteko gizona da eta, “obesitatea eta kolesterola” salbu, beste inolako osasun arazorik ez duela adierazi du.

Martxoaren 6an hasi zen gaixo sentitzen, eztarriko minarekin. Beraz, bere kabuz hasi zen “paracetamola eta ibuprofenoa” hartzen, eta mina desagertzen hasi zela gehitu du.

Dena den, hurrengo bi egunetan mina areagotu zitzaion, eta belarriko mina izaten hasi zen. Botiken dosiak handitu zituen orduan.

Astelehenean, martxoak 9, farmaziara joan zen eta anestesia spray bat erosi zuen, dendariak hala gomendatuta. Arratsaldean medikura joan zen eta amigdaletan inolako plakarik ez zuela esan zion medikuak. Badaezpada, pertsonen arteko metro eta erdiko distantzia mantentzen hasia zen jada.

Hurrengo egunean, otorrinolaringologo batek amigdalen atzetik abzesu bat zuela ikusi zuen eta kortisona eta antibiotikoa errezetatu zizkion.

Ondorengo bi egunetan eztarriko minak behera egin zuen, ez ordea belarrikoak. Hori dela eta, hirugarren egunean, ostiralean, Gurutzetan ospitaleratu zuten abzesua zain barnetik tratatzeko.

Hurrengo hiru egunak sukarra joan eta etorri pasatu zituen, medikazioa hartzean behera egiten baitzuen. Baina eztulka hasi zen eta medikuek ospitalean egun bat gehiago mantentzea erabaki zuten, probak egiteko asmoarekin. Asteartea, martxoak 17, sukarrarekin eta buruko minarekin hasi zuen, eta Covid-19 probak positiboa eman zuen.

Asteazkenean, nekea, sukarra eta eztula sentitu zituen, pneumonia zuen jada. Hala ere, hurrengo egunean, oharra idatzi zuenean, hain zuzen ere, sukarra desagertua zegoen, eta buruko min eta neke gutxiago zituen.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa