Hilabete igaro da alarma egoera eta konfinamendua ezarri zirenetik. Egoera berriak ohitura eta joera berriak sortu ditu eskualdeko bizilagunen artean. Arratsaldeko zortzietako txaloak dira horren adibide bat, baina ez bakarra.
Eskualdeko zenbait DJek, adibidez, balkoietara mugitu dute oholtza. Hori da Jon Masaren kasua. Larunbatero aritzen zen Laudioko Haitzulo tabernan musika jartzen. Gauzak hala, konfinamenduak iraun bitartean asteburuko planari eutsi nahi izan dio. “Gauzak nola dauden ikusita ez da ideia txarra jendeak denbora beste gauza batzuekin pasatzea”, azaldu du gazte laudioarrak. Horregatik erabaki zuen bere auzoari “gatz pixka bat” ematea. Ostiral eta larunbatetan jartzen du musika, 20:30etik 21:30era.
Ekimenak “bi harrera mota” izan ditu, Masaren arabera. “Adineko pertsonak balkoira ateratzen dira baina minutu bat igarota berriro etxera sartzen dira. Baina nire adineko jendea, adibidez, balkoietan dantzan hasten da”.
Aretan ere gauero entzun daiteke musika emanaldia, zortzietatik aurrera. Pedro Sandin aritzen da musika jartzen, hori baitu zaletasun. “Arratsaldeko zortzietatik aurrera aritzen naiz. Umeentzako abestiak jartzen ditut lehenbizi, eta helduagoak direnentzat gero. Gaixoei eta osasun langileei elkartasuna helarazteko egiten dut, oso polita da".
Musikarekin girotu dute iluntzea Aretan. Bideoa: @Unaiareta pic.twitter.com/UD00JaKsiD
— Aiaraldea.eus (@aiaraldea) March 27, 2020