Goizean goizetik mugimendua sumatu da herrietako kaleetan. Jolasguneak itxita egon arren, zelaiak, espaloiak eta plazak bihurtu dituzte haizea hartzeko eremu herri gehienetan. Alabaina, ordubeteko baimena soilik izan dute kalera irteteko txikienek deskonfinamenduaren lehen fase honetan. Parkeetako zelai guneak eta plazak izan dira topaleku handienak, beti ere distantzia errespetatzeko ahaleginarekin.
Laudion auzoetako plazak aukeratu dituzte herritar gehienek; eta Amurrion etxebizitzen arteko espaloietan aritu dira jolasean bizilagun asko. Urduñan ere jolas giroan igaro dute goiza haurrek.
Zernahi gisaz, nola gurasoek hala haurrek izan dute haizea hartzeko aukera, kilometro bateko eremuan. Ohi bezala, dendetan eta etxebizitzen inguruetan nabaritu da jende multzo gehien. Bizikletak eta patineteak izan dira oro har nagusi bazter guztietan.
Espaloietatik lagun eta senideekin hizketaldiak
"Goxokiak erosi ditugu askaltzeko", adierazi diote pozarren Aiaraldea komunikabideari bi umek. Aiton-amonak eta lagunak agurtzeko tartea ere hartu dute espaloietatik toki askotan.
Aiaraldea osoan, ordea, kale apainketak eta zaintzeko aldarriak begiztatzeko aukerarik ez da falta; normaltasunera itzultzeko esperantzan, herritarrek elkarri agur egiten dieten bitartean.