Osakidetzak koronabirus positibo bakarra diagnostikatu zuen atzo Aiaraldea osoan, Laudion, alegia. Aintzat hartuta larunbatean aste honetako kopuru berri handiena topatu zuela osasun sistemak 10 kasurekin, murrizketa nabarmena izan da: %90ekoa egun batetik bestera.
Berez, igaro berri dugun astean 20 positibo jaso ditu Osakidetzak. Hau da, aste osoan zenbatu dituzte pandemiako egunik okerrena bildutako kopuru bera, 20 kasu aitortu baitzituen osasun sistema publikoak apirilaren 2an.
Beherantzako joera adierazten jarraitzen du horrek. Krisiaren lehenengo astean 45 positibo egon ziren, bigarrenean 84, hirugarrenean 56, laugarrenean 30, bosgarrenean 24 eta atzean utzi berri dugunean, aldiz, 20.
Martxoaren amaiera izan zen, berez, bolada okerrena kutsatu berrien zenbaketari dagokionez, baina jadanik kopuruak joan dira egonkortzen. Laudion 104 gaixo daude, Amurrion 73, Urduñan 26, Aiaran 24, Orozkon 18, Artziniegan 9 eta Okondon 6.
EAEn 14.412 dira positiboak; 8.189 Bizkaian, 3.624 Araban eta 2.599 Gizpuzkoan. Hildako berrien kopurua murrizten ari da ere eta atzo 11 izan ziren zendutako herritarrak.