Asteburuko datuek zalantzak sortu ohi badituzte ere, Aiaraldea pasa den asteko kopuruetara itzuli da Covid-19ko kasu berriei dagokienez. Izan ere, atzo osasun sistema publikoak ez zuen gaixo berririk diagnostikatu. Hirugarren aldia da marka horretara heltzen dela eskualdea, apirilaren 20an eta 27an ere ez baitzen kutsatu berririk egon.
Joera hori berreskuratu du Aiaraldeak apirilaren 28an eta 29an 77 positibo berri identifikatu ostean. Kasu horiek agertu ziren hainbat herritarri testak egin ostean, nahiz eta gaixotasuna gainditu zuten.
Ostiralean eta ostegunean 6 kasu egunero izan ostean, eskualdeak 0 kasu berri izan ditu eta aurreko bi asteetan ohiko kopuruetara eta beherantza doan joerara itzuli da.
Horrezkero, 349 dira Aiaraldeak erregistratu dituen positiboak eta horrela banatuta daude: Laudio 123 kasu, Amurrio 99, Aiara 61, Urduña 29, Orozko 19, Artziniega 12 eta Okondo 6.
Atzo EAEn 3.500 test inguru gauzatu zituen Osakidetzak -aurreko egunetan baino nabarmen gutxiago, asteartean 10.000 izan baitziren- eta 78 kasu positibo berri detektatu zituen. Horrela, 16.197 dira kasuak erkidegoan, 9.233 Bizkaian, 4.188 Araban eta 2.776 Gipuzkoan. Atzo 8 lagun gehiago hil ziren eta 1.329 zendu dira jadanik. 219 herritarrek jaso zuten alta eta 20k utzi zuten ospitalea. Hala ere, 524 ospitaleratu daude jadanik eta horietako 90 ZIUn.