Zer ikasi zenuen eta zertan bilakatu zinen aditu?
Biokimika eta Biologia Molekular gradua ikasi nuen EHUn. Gradua amaitu ostean Salamankara etorri nintzen Biozientziak: Minbiziaren biologia eta klinika masterra egiteko.
Non zaude lanean orain?
Egun, Salamankako Minbiziaren Ikerkuntza Zentroan (CIC-IBMCC) nago tesi doktorala egiten. Masterra amaitu ostean nire Master Amaierako Lanaren zuzendariak tesia egiteko aukera eskaini zidan eta baietza eman nion.
Zer ari zara ikertzen han zehazki?
Bigarren neoplasia hematologiko arruntena gaude ikertzen ikerketa taldean, mieloma anizkoitza deritzona. Zehazki, pazienteen immunitate sistema aktibatzeko estrategiak ikertzen ditugu, immunitate sistema berak minbizia desagertarazi dezan.
Horrez gain, gure gorputzak kimioterapien aurrean garatzen dituen erresistentzia mekanismoak ikertzen ditugu baita erresistentzia horri aurre egiteko moduak ere.
Zerk egiten du bereziki interesgarri ikerketa eremu hori?
Zoritxarrez minbizia eguneroko kontua da. Beraz, ahal dugun guztia egin behar dugu gaixotasuna desagertarazteko.
Gainera, nahiz eta minbizia oso gaixotasun konplexua izan, minbizi moten artean badaude antzekotasunak. Beraz, bakoitzak bere esparruan egiten duen ikerkuntzak beste minbizi motetan lagundu dezake.
Zergatik zaude atzerrian eta ez Euskal Autonomia Erkidegoan?
Esan bazala, Salamancan nago; hainbat masterrei buruz informazioa bilatu ostean Salamankakoa egitea erabaki nuen minbiziarekin zerikusi handiena zuena zelako.
Baditut lagunak etxean tesia egiten eta lan aukera gehiago dituztela diote Salamankan daudenek, ikerkuntza zentro gehiago baitaude seguru asko; zorionez, gehiago inbertitzen delako.
