Atzo ez zen COVID-19 positibo berririk egon eskualdean. 404 gaixo diagnotikatu ditu Osakidetzak guztira Aiaraldean koronabirusaren krisia hasi zenetik, baina gehienak aspaldiko kasuak dira. EAEn 5 kutsatu berri detektatu ziren atzo PCR probaren bidez, eta bi lagun zendu ziren gaixotasunak jota.
Hortaz, bere horretan jarraitzen du Aiaraldeko herrien egoerak: 149 gaixo detektatu dira guztira Laudion krisia hasi zenetik, 111 Amurrion, 63 Aiaran, 39 Urduñan, 24 Orozkon, 11 Artziniegan eta 7 Okondon. Arakaldo eta Arrankudiaga-Zollon ez da positiborik egon oraindik, ofizialki behintzat.
EAEri erreparatuta, 1.513 pertsona hil dira dagoeneko, atzo beste bi heriotz kontabilizatu eta gero. 5 gaixo detektatu ziren PCR probaren bidez eta 92 proba azkarra baliatuta. Guztira, 19.671 pertsona gaixotu ditu koronabirusak orain arte.
Horietatik, soilik 263 biztanle daude oraindik gaixorik EAEn, atzo 193 sendatu eta gero. Dena den, 28 gizabanako daude ZIUn, herenegun baino bat gehiago. Lurraldeka, atzo ez zen positibo berririk egon Araban eta 3.002ko zifra totala mantendu da. Bizkaian 4 lagun kutsatu ziren eta 7.596 dira dagoeneko, eta Gipuzkoan kasu berri bat detektatu zen (2.314 zenbatu dira guztira martxotik hona).